“今日嘅投資者，已經逐漸由恐慌變成貪婪, 製造緊一個比海嘯更大、參與者更多嘅資產泡沫。骷髏會最唔想見到嘅, 係資金氾濫，推高所有資產價格，個市又一直無大型調整，令資產價格同實體經濟增長嘅差距愈黎愈大。”
如果歷史真係有教育意義嘅話, 喺發生左73年股災之後, 又點會仲有87年, 97年同舊年08年嘅股災呢? 每次股災嘅根源, 都係炒得太高, 令到價錢太貴, 亦即係市盈率PE太高。
恒生指數由創立開始計, 平均市盈率係14. 5倍左右, 如果超出呢個平均數好多，通常都無好結果。遠嘅唔講, 就講07年, 一個港股直通車嘅傳聞, 就令到恒指輕易由兩萬點，炒到上三萬二千點, 當時嘅平均PE曾經去過24倍咁高!
之後嘅市況，大家都好清楚, 個市唔夠年半，就跌到得返萬一點, 各位無可能唔記得當時恐怖嘅情境，但係睇黎就已經忘記左當中嘅教訓。如果唔係, 近期恒指又點會回升得咁快? 新股又點會熱炒? 劵商同銀行點會掀起低息孖展大混戰? 乜Ｄ經濟問題，真係解決晒嗱咩?
今日嘅投資者，其實已經逐漸由恐慌變成貪婪, 製造緊一個比海嘯更大、參與者更多嘅資產泡沫。而家恒指上返二萬一嘅水平, PE唔覺唔覺已經炒到上18倍左右，己經比平均數高左好多。
黎到呢個地步，有兩個可能會發生嘅情況。第一個情況，亦都係比較理想嘅，就係股市調整嘅速度夠慢, 等全世界嘅經濟有足夠時間去復原。咁樣企業利潤嘅增長, 就可以快過股市調整嘅速度,拉低恒指嘅平均PE, 再慢慢帶動返股市上升, 咁就可以安全咁避過一劫。
而另一個可能性，同時係骷髏會最唔想見到嘅, 就係資金氾濫，推高所有資產嘅價格，經濟復甦嘅步伐，遠遠追唔上股市上升嘅速度，而個市又一直無大型調整。呢種情况維持得愈耐，資產價格同實體經濟增長嘅差距，就會愈黎愈大，意味住個泡沫亦都會愈吹愈大。咁大個泡泡萬一爆起上黎，無論你係唔係股民，都一樣會受到衝擊。
總之係呢個時候，大家要記住股神巴菲特嘅名言，永遠喺市場貪婪時恐慌，等到個市再調整時，先至貪婪都唔遲!
No comments:
Post a Comment