香港投資市場又再度活躍，市盈率有成三、四十倍嘅國藥招股，竟然可以凍結5,000億嘅資金！一隻無乜經營歷史嘅殯儀新股中國生命(08296.HK)，响幾日內可以升五、六倍，唔單止咁，豪宅天璽頂層複式單位，意向呎價去到7萬！唔通香港經濟真係咁好？仲係好似八十年代咁遍地黃金？其實各位聽眾細心D去分析一下，就知道呢個係反彈，定係股市同樓市都一齊進入長期上升軌。而家失業率未有回落嘅跡象，自己份工，或者盤生意既前景又麻麻，消費意慾就一定唔方高得去邊，仲何來有心情去發掘投資機會？有趣既係，本地樓價反而一升再升，香港人置業能力，慢慢咁俾來自四方八面既熱錢陰乾緊呀！
資金由四方八面咁湧入來，係有原因既。記性好嘅聽眾，應該都記得，骷髏會响年頭果時已經提大家，推行百份百存保，會吸引歐美資金蜂擁而至，亦會產生另一場資產泡沬，呢個遊戲，大概可以玩到一年左右，好彩既就玩到年半。再加上响香港投資650萬，就可以做投資移民，唔怪得最近咁多內地富豪黎香港買股票、掃豪宅啦！歐美同大陸資金一齊出招，當然輕易炒起成個香港啦！骷髏會唔敢估頂位喺邊，只知道虛火遊戲，開始左一半左右，當大家驚覺實體經濟並無反彈果時，資產下跌既速度，將會快過海嘯果時！所以，升市帶來嘅利潤咪當真，跌市果時剩返果D錢至係你嘅！
No comments:
Post a Comment