未來十年，企業最需要...

“未來十年，企業最需要o既，係識得去分析同應用網絡數據o既人才。新一代要成功，就要好好把握互聯網呢個黃金機遇喇!”

科網股泡沫爆破之後, 唔少人質疑網絡嘅賺錢能力。反而係今次金融海嘯，令到我地少左出街，多左時間上網，造就互聯網成為好有力嘅搵錢工具。大家睇下騰訊, 竟然可以係咁嘅經濟環境底下，賺多左9成，就會明白網上世界，特別係內地互聯網市場，可以有幾大既商機。

响內地一間工業學院，有近四分之一嘅學生，每日响校舍裏面，好忙咁將一批又一批嘅衫褲鞋襪同日用品入箱、封好，然後寄去買家手上。佢地並唔係响宿舍開鋪做生意，而係利用阿里巴巴旗下嘅網上購物平台「淘寶網」去接訂單。

咁樣做生意嘅好處係，D學生唔洗入定貨去賣, 只需要係收到訂單之後，先去批發市場入平貨。而且，係網上交收錢銀亦都好安全, 因為用嘅係一個叫「支付寶」 嘅系统，買家先入錢落去, 賣家就會立即寄貨, 到買家收到現貨之後, 系統 至會過數比賣家。咁樣, 就可以用極低嘅成本，賺取可觀而且無乜風險嘅回報。

呢班內地學生最成功嘅地方，就係識得喺資訊爆炸嘅互聯網世界裡面，為買家同賣家建立交易嘅渠道，自己就從中獲利。

而家網上資訊流通量激增，正如一般做生意，要捕捉人流，而家企業嘅致勝關鍵，就係掌握網上嘅人流，所以我地每一日搜尋嘅話題、網上活動嘅習慣同埋互動嘅軌跡，都成為相當有商業價值嘅資料。

不過，淨係有呢D硬資料並唔夠，呢一刻，企業最需要嘅，係識得去分析同應用呢D資料嘅人才。所以，未來十年，一個冷門學科將會上位，就係統計學喇。

目前，Google有250個所謂「網絡數據分析師」(statistical analyst)，佢地都係數學系或者統計學嘅專才，負責改善搜尋功能。而IBM亦响4月成立左一個研究室，目標係組織一個超過4,000人嘅數據分析大軍。如果你揸住一個統計學博士學位，一入職嘅年薪已經有97萬咁多！

年青人成日話D機會一早比上一代攞晒, 咁新嘅一代要成功, 就要做一D上一代未必識做嘅野, 互聯網嘅發達可以話係天賜良機，後生仔要發圍，就要好好把握呢個黃金機遇喇!